Endurnýjun lífdaga

Kerling hefur verið upptekin.

Nr. 1 Kerling fór til Köben
Nr. 2 Kerling sagði upp vinnu sinni
Nr. 3 Kerling fór á Cortéz
Nr. 4 Kerling stofnaði eigið einkahlutafélag
Nr. 5 Kerling ákvað að gifta sig með pomp og prakt

Kerling og karl héldu til Kaupmannahafnar í næstliðinni viku með vinnufélögum kerlingar. Var þetta hin skemmtilegasta ferð. Kerling gætti hófsemis fyrsta kvöldið, en dembdi í sig margslungna alkóhóldrykki það næsta. Passaði sig þó á því að troða belginn af mat áður en gengið var til náða í dagrenningu, og var því nokkuð hress eftir stuttan svefn. Þriðja kvöldið eyddi kerling í rússíbana og öðrum tívolítækjum. Því fjórða eyddi hún með Kay Scarpetta í flugvélinni á leiðinni heim. Jú, það var farið í skoðunarferð og Strikið var mælt út og eitthvað glingur keypt. Vinkonur heimsóttar og börn kjössuð. Ánægjuleg ferð í alla staði.
Þegar heim var komið var farið að skoða rekstraráætlanir og stofnkostnað og þvíumlíkt. Kerling er svo heppin að vera umkringd sterkum og ákveðnum konum. Með þennan bakhjarl verður allt svo auðvelt, líka það að stofna eitt fyrirtæki. Þar sem kerling telur sig nú ekki vera síðri en strákarnir, var auðvitað ekki um annað að ræða en að taka oggupínulitla áhættu og demba sér út í eigin rekstur. Var uppsagnarbréf lagt inn til yfirmannsins og um kvöldið var farið á Cortéz. Fékk kerling þar guðdómlega útrás fyrir alla spennu sem safnast upp við svo stórar ákvarðanir. Kerling stappaði fótum og klappaði og naut þess að finna kraftinn frá þessum geðþekka manni. Daginn eftir ákvað svo kerling að breyta fyrirhuguðu látlausu brúðkaupi í megapartí ársins. Fyrst maður er á annað borð farinn að hugsa stórt, því ekki að láta það sama yfir allt ganga?
Kerling hefur ekki verið svona framkvæmdarsöm í heil sjö ár. En þá tókst henni að eignast sambýlismann, eitt barn með honum, og tvö stjúpbörn á 6 og hálfum mánuði. Barnið vildi flýta sér í heiminn. En það tekur víst mannslíkamann sjö ár að endurnýja sig.

Kerling gekk í endurnýjun lífdaga við upphaf þessa árs.