Kerling er í miklu átaki þessa dagana. Eftir tveggja vikna sukk á sólarströnd í sumar kom kerling heim heilum 3 kílóum þyngri. Sukkið fólst í því að kerling leyfði sér að drekka einn bjór á dag í tvær vikur. Einn lítinn flöskubjór. Kerling fékk áfall er hún steig á vigtina er heim var komið, komin yfir 70 kílóa múrinn sem hefur hingað til ekki verið rofinn nema þegar gíslatökuræningjar hafa tekið sér bólfestu í kroppi kerlingar. Kerling hugsaði ráð sitt í 3 vikur. Eftir þá yfirlegu var niðurstaðan sú að allt innan skynsamlegra marka hafi verið reynt í baráttunni við aukakílóin, nema að ráða sér einkaþjálfara. Og það gerði kerling. Í fyrsta tímanum vigtaði þjálfarinn og mældi kroppinn í bak og fyrir og lét kerlingu taka þol- og styrktarpróf. Þegar því var lokið upplifði kerling sig í fyrsta skipti sem gamla. Hvort það var niðurstaða mælingarinnar og lítið úthald sem hafði þau áhrif, eða sú staðreynd að sá sem mældi kerlingu er bæði ungur og sætur, er kerling ekki alveg klár á. En kerling ákvað að taka á honum stóra sínum og drösla sínum feita rassi daglega í ræktina. Og viti menn, hvað gerðist? Jú, eftir heils mánaðar puð hefur kerling losað sig við eitt kíló. Eitt heilt kíló. Einhvers staðar segir að góðir hlutir gerist hægt. Best að ríghalda í það til að tapa ekki glórunni.
|